Неодамна познатиот и сè почесто баран македонски бенд 4U Band во соработка со најдобрите – Арт Студио продукција и Балкан Мјузик телевизија реализираше нов, мошне интересен музички ТВ проект. Станува збор за динамичен микс од десет светски поп, рок и латино хитови, кои овојпат добија свеж, модерен и уникатен македонски звук во изведба на еден од најпрофесионалните состави на домашната сцена.
Меѓу избраните композиции се најдоа легендарни песни како “Gimme! Gimme! Gimme!” од ABBA, “Bamboleo” од Gipsy Kings, “Be My Lover” од La Bouche, “Move Like Jagger” од Maroon 5, како и вечната “Lambada” од Kaoma. Публиката ќе може да ужива во уште многу други безвременски хитови, кои 4U Band ги претставува во сопствен, енергичен стил — спојувајќи модерна продукција, раскошна инструменталност и препознатлива македонска емоција.
Аудио-снимките се направени во MT Music Studio во Прилеп, под продуцентската палка на Менде Ташкоски, еден од најпочитуваните музичари и продуценти во земјата. Видеопродукцијата, пак, ја потпишуваат Арт Студио продукција и Балкан Мјузик телевизија, кои се погрижија секој кадар да ја долови енергијата и харизмата на бендот.
Освен тимот зад камерите, 4U Band упатува голема благодарност до своите соработници – Студио за танц “STARS” од Кавадарци и мексиканскиот ресторан “Señor Truco” од Неготино, кои придонесоа со својата креативност и поддршка во визуелниот дел на проектот.
Бендот 4U Band постои повеќе од шест години, а во последните девет месеци работи во проширен состав, што му дава нова енергија, посилна сценска динамика и побогат звук. Тековниот состав на бендот е следниот:
- Наталија Траиловиќ Чичаковски – женски вокал
- Борис Илов – машки вокал и гитара
- Борче Митрев – клавијатури
- Никола Стоев – саксофон
- Стефан Николов – труба
- Аце Чоклев – тапани
- Александар Перески – хармоника и конги
Членовите лично го избраа и аранжираа репертоарот, стремејќи се да создадат мост меѓу светската музика и локалниот звук, со што уште еднаш потврдуваат дека 4U Band е синоним за квалитет, професионализам и страст кон музиката.
Премиерното прикажување на проектот е закажано за среда, 22 октомври, ексклузивно само You Tube каналот на Балкан Мјузик телевизија, а се разбира и на програмата на единствената македонска музичка телевизија. Публиката може да очекува возбудлив микс на ритам, гласови и емоции – вистинско музичко патување низ времето и жанровите.
4U Band со овој музички тв проект потврдува дека е меѓу водечките бендови на македонската сцена, подготвен да ги изненадува обожавателите со нови идеи и беспрекорна изведба.
Текстот го подготви: Иван Јосимовски
