Вчера, екипата на Балкан Мјузик телевизија беше дел од прес-конференцијата посветена на еден од најстарите музички фестивали во Македонија – „Фолк Фест Валандово“. Со свечена и емотивна прес-конференција во новото кино, започна одбројувањето до 38-то издание на фестивалот кој веќе четири децении е чувар на македонската фолк-песна.
Во присуство на медиуми, изведувачи, организатори и љубители на народната музика, фестивалот беше најавен со топлина и достоинство. Манифестацијата ја отворија долгогодишните водители – Ѓорги Калајџиев и Ирена Спировска – кои со својата препознатлива харизма и љубов кон музиката внесоа ведрина во атмосферата.
Градоначалникот на Валандово, г-нот. Перо Костадинов, со гордост нагласи дека „Фолк Фест Валандово“ е не само музички настан, туку жива традиција и културна вредност која го обединува народот. Уметничкиот директор Живоин Глишиќ пак, ветува високи уметнички стандарди и репертоар кој ќе ја разбуди носталгијата, но и ќе понуди нова енергија.
Клучниот момент – извлекувањето на редоследот на настапите – го означи и симболичниот почеток на фестивалот. Првата калинка беше извлечена од страна на учесниците, а честа да го отвори овогодинешното издание ја доби Дарко Билбиловски со композицијата „Мерак на душата“. Вечерта ќе биде збогатена и со ревијален настап на легендата Перо Христов, кој со својот глас и автентичност ќе нè врати во времето на изворната песна, потсетувајќи нè на нејзината безвременска убавина.
Организаторите оваа година ветија иновативни елементи и нов концепт на фестивалската вечер, со цел да се задржи свежината на настанот. Гласањето за најдобра песна останува во рацете на публиката, преку проверен и транспарентен систем на кутии.
Валандово повторно живее, пее и раскажува – со песна што поврзува генерации и со калинка што цвета секоја пролет со нови спомени.
Текстот го подготви: ПР тимот на Балкан Мјузик ТВ
