По цела година макотрпна подготовка, вложен труд, страст и љубов кон македонската народна музика, на 29-ти мај 2025 во Домот на културата „Ванчо Чавдарски“ во село Владимирово, се одржа првото и ревијално издание на „Фолк Фест Владимирово“ – фестивал кој уште од првиот чекор покажа дека има потенцијал да стане нова музичка институција на македонската сцена.
На покана од маестро Горан Алачки, утрото на 28-ми мај заедно со дел од фестивалската екипа нашата екипа беше поканета и се упативме кон Владимирово. По пријатно патување од околу два часа, бевме пречекани од организаторите Горан Алачки и Марина Дојчиновска, со срце отворено како источниот дел од Македонија што отсекогаш знаел да пречека гостин.
По утринското кафе и кратка прошетка низ мирното и убаво село, се одржа и првата генерална проба. Дел од учесниците ги изведоа своите песни пред мал круг присутни, но и пред љубопитните мештани. Особено емотивен момент беше најавата дека поради смртен случај, пејачката Виданка Ѓоргиева нема да настапи, а нејзината песна ќе ја испеат Ленче Кукиќ, Зуица Лазова и Жаклина Узунова со поддршка од сите изведувачи.
Преноќувањето беше организирано во Берово, а фестивалската екипа ја искористи приликата да го посети градскиот музеј и културно-историските знаменитости. Утринското кафе во кафулето „Гого“ стана неформално собиралиште пред големиот ден.
Како што налага традицијата, фестивалот започна со свечено добредојде – млади девојчиња со домашен леб и сол на влезот од Домот на културата. Сцената блескаше, салата беше полна, камерите на МРТ позиционирани, а оркестарот подготвен.
Фестивалот започна со химната на „Фолк Фест Владимирово“, а првиот кој ја доби честа да настапи беше Драган Мијалковски со песната „Тука сум роден јас“, која предизвика бран емоции. Потоа следуваа настапите на:
- Круме Спасовски со „Мирна река“
- Зуица Лазова со „Срце предавник“
- Горан Кукиќ со „Голем мерак имам јас“
- Жаклина Узунова со емотивната „Заскогаш“, проследена со солзи
Публиката со громогласен аплауз ја поздрави и Ленче Кукиќ со веселата „Ракија се пече“, како и настапите на:
- Наум Петрески – „Горо ле горо“
- Ванчо Тарабунов – „Јован делија“
- Нино Величковски – „Старата ламба“
- Перо Христов – „Љиљано моја“
Како круна на вечерта, композицијата „Наша Македонија“ беше изведена во чест на Виданка Ѓоргиева од Ленче Кукиќ, Зуица Лазова и Жаклина Узунова, со поддршка на сите учесници. Сето тоа беше музички симбол на заедништво, љубов и сплотеност.
Многумина од присутните новинари коментираа дека „Фолк Фест Владимирово“ потсетува на златните времиња на „Фолк Фест Валандово“. Можеби ова е почеток на ново, искрено, органско враќање на македонската фолк музика таму каде што и припаѓа – до срцето на народот.
Со силни емоции, аплаузи и љубов, заврши првото издание на фестивалот. Една врата е отворена. Една нова страница во македонската музичка историја е напишана. И сигурни сме – ова е само почеток.
Текстот го подготви: Балкан Мјузик ТВ
