На снимањето на најновата епизода од најгледаниот музички серијал во Македонија – „На Здравје“, кое вчера се одржа во живописното Македонско Село, ексклузивно и за прв пат во јавноста се појави новиот музички состав „Анета Бенд“.
Овој нов бенд го носи препознатливиот печат на една од најмоќните и најценети женски вокали во Македонија – Анета Љумаковска, која моментално сè уште е под договор со популарниот Дакапо Бенд. Како што дознаваме, официјалниот старт на „Анета Бенд“ со снимање на нови песни, настапи на семејни прослави и концерти е закажан по Нова година, кога истекува актуелниот ангажман на Љумаковска.
Особено внимание привлече веста дека во составот на „Анета Бенд“ како нов член се приклучува и познатиот музичар Вангел Мажевски, кој уште повеќе го зајакнува звукот и енергијата на овој нов бенд.
За време на снимањето на најновата епизода од музичкиот серијал „На Здравје“, ексклузивно и премиерно за гледачите на Балкан Мјузик Телевизија, „Анета Бенд“ ги изведоа песните: „Иле Илија“, „Крв Македонска“, како и најновата авторска песна „100 по Рихтер“, која публиката ја прими со огромен ентузијазам.
Редакцијата на Балкан Мјузик Телевизија им посакува на „Анета Бенд“ многу среќа, здравје и успех на музичката сцена, со надеж дека нивните проекти ќе ја збогатат македонската музичка ризница.
Текстот го подготви: Иван Јосимовски
