Пред 12 години Македонија остана без еден од своите најавтентични и најмоќни фолк интерпретатори – Војо Стојановски, човекот чиј глас стана симбол на македонската песна, традиција и емоција. Но, и денес, неговите песни живеат подеднакво силно – на свадби, прослави, иселенички средби и во срцата на генерации Македонци ширум светот.
Со препознатливата интерпретација и искрената емоција, Војо знаеше да ја раскаже секоја приказна низ песна – било да станува збор за љубов, печалба, татковина или семејство. Хитовите како „Ти донесов млада невеста“, „Свадба голема“, „Една мисла имаме“, „Нема друга Македонија“ и „Суводолица“ одамна прераснаа во музичко наследство кое не познава време.
Неговото музичко патување сериозно започнало во 1975 година, кога на фестивал во Пробиштип победил со песната „Море абер дојде Ајше ле мори“. Токму тогаш, охрабрен од големи музички имиња како Пеце Атанасовски, Јонче Христовски и Мате Грујовски, решил целосно да му се посвети на фолкот. Само неколку години подоцна, неговиот глас веќе бил препознатлив низ цела Македонија.
Но, Војо не беше само македонска ѕвезда – тој беше и миленик на дијаспората. Со десетици турнеи низ Австралија, Америка, Канада и Европа, тој ја носеше Македонија таму каде што живееја Македонците далеку од дома. Особено ќе остане запаметена победата на фестивалот во Камбера во 1992 година со патриотската „Нема друга Македонија“, песна која и денес предизвикува емоции кај секој Македонец.
Во текот на кариерата соработуваше со бројни автори и музички имиња, меѓу кои Ристо Краповски, Борче Нечовски, Огнен Неделковски, Блага Петреска, Мирко Митревски и Виданка Ѓорѓиевска, создавајќи репертоар што остави неизбришлива трага во македонската народна музика.
Покрај сцената, Војо беше и посветен сопруг и татко. Во бракот со новинарката Евица Камберова – Стојаноска го доби синот Дамјан, кој денес успешно чекори по музичкиот пат на својот татко, продолжувајќи ја семејната традиција.
На 6 мај 2014 година, по кратко боледување, Македонија се прости од својот голем пејач. Но, вистинските легенди никогаш не заминуваат целосно. Тие остануваат да живеат низ песните, спомените и емоциите што ги оставиле зад себе. А кога ќе се запее „Нема друга Македонија“, гласот на Војо Стојановски и денес одекнува исто силно.
Текстот го подготви: Иван Јосимовски
