Во време кога музичката сцена постојано се менува, една македонска група реши да се врати кон корените — но на свој, модерен начин. „Модерато Бенд“, сè попопуларен меѓу публиката, реализираше нов музички проект составен од најпознатите македонски народни песни, оние што, како што велат и самите, „никогаш не умираат“.
Идејата, како што откриваат членовите на бендот, се родила спонтано — но одлуката била едногласна.
„Сите се согласивме дека е време да направиме нешто што ќе ја негува традицијата, а во исто време ќе ѝ даде нова енергија“, велат од бендот.
Аудио записите се реализирани во „Анастасија студио“, под продукциската палка на Љупчо Павловски, додека визуелниот дел е дело на најдобрите – Арт Студио продукција. Целиот процес, според нив, поминал во одлична атмосфера, исполнета со позитивна енергија — нешто што, како што додаваат, неизбежно се чувствува и во финалниот производ.
„Сè течеше природно — и музиката и видеото. Имавме одлична енергија и тоа се пренесе и во проектот“, раскажуваат тие.
Бендот го сочинуваат шестмина музичари, секој со своја улога во создавањето на препознатливиот звук: на тапани е Менде Нелоски, хармоника свири Димитар Митревски, на кларинет е Мартин Данов, клавијатури ги делат Дарко Волчев и Трајче Гогов, додека вокалот е во рацете на Дане Ќосески. Во моментов, „Модерато Бенд“ активно настапува низ локали ширум Македонија, но најчесто може да се сретне во нивниот роден град Кавадарци. Веќе по Велигден, како што најавуваат, започнува и најдинамичниот период за нив — свадбената сезона.
„Со нетрпение ги очекуваме свадбите. Тоа е посебна енергија и чест ни е што сме дел од најубавите моменти на луѓето“, велат тие.
Но тука не застануваат. Бендот веќе подготвува и нов авторски материјал. Следната песна, дело на нивниот колега Дарко, наскоро ќе биде објавена, а плановите вклучуваат и снимање на видео запис.
Со комбинација од традиција, модерна продукција и искрена енергија, „Модерато Бенд“ полека, но сигурно го гради својот препознатлив музички идентитет — оној што ги спојува генерациите на едно место.
Текстот го подготви: Иван Јосимовски
