По огромниот успех и исклучителниот интерес што го предизвика нивниот претходен проект „Седенка“, членовите на Класико бенд повторно ѝ приредија вистинска музичка гозба на публиката со новото продолжение – „Седенка 2“. Овој пат, проектот е снимен во топлиот и автентичен амбиент на Ресторан „Крушевска одаја“ во Крушево, место каде традицијата, духот и македонскиот звук совршено се спојуваат.
Од објавата на првата „Седенка“, љубителите на македонската музика со месеци бараа и очекуваа продолжение. Гледаноста на YouTube и реакциите на социјалните мрежи сведочат дека новото дело на Класико бенд беше повеќе од посакувано.
„Ние работиме за народот. Она што го чувствуваме од публиката, тоа и го создаваме“, велат членовите на бендот, објаснувајќи дека токму љубовта кон традицијата и поддршката од слушателите ги поттикнала да продолжат со уште една автентична музичка приказна.
Како и многупати досега, зад техничката реализација и визуелниот квалитет стои тимот на едни од најдобрите – АРТ Студио продукција, продукција со која Класико бенд долги години успешно соработува.
„Свесни сме колку многу ни помогнаа во сите претходни проекти, па затоа соработката со нив продолжува и понатаму“, додаваат од Класико Бенд. Професионалниот пристап, препознатливиот визуелен стил и вниманието на деталите повторно се покажаа како добитна комбинација.
Како и во првиот дел, во видеото се појавуваат глумците од кавадаречкиот театар и тоа: Диме Коцевски, Видан Станоев и Александар Видиков, чија енергија и изведба му даваат дополнителна топлина и живот на проектот.
Бендот упатува и голема благодарност до сите гости кои учествуваа и помогнаа „Седенка 2“ да добие препознатлив домашен карактер.
Во проектот учествуваат и следните членови на бендот:
- Ангела Стефковска – вокал
- Андреј Алексов – вокал
- Драган Петков – хармоника
- Димитар Михајловски – виолина
- Димитар Лазов – клавијатури
- Игор Илковски – ударни инструменти
Н нивната заедничка музичка хемија, прецизна изведба и љубов кон народниот звук повторно се покажаа како најсилен адут на Класико бенд.
И на крајот од денот, „Седенка 2“ не е само продолжение – тоа е потврда дека македонската музика, кога е создадена со љубов, почит и професионализам, може да допре до илјадници и да обедини генерации. Со топла атмосфера, врвна изведба и автентичен звук, Класико бенд уште еднаш докажа дека е меѓу водечките имиња на домашната сцена во зачувувањето и унапредувањето на традицијата.
Текстот го подготви: Иван Јосимовски
