На Денот на независноста на Република Македонија, 8-ми септември, „Балкан Мјузик“ телевизија им подготви на гледачите вистинска празнична програма исполнета со македонска песна, радост и традиција.
Во понеделник, со почеток од 20 часот, Балкан Мјузик телевизија ексклузивно ќе го емитува јубилејното 15-то фестивалско издание на „Лешочки Фолк Фест“ – еден од најпознатите фолклорни фестивали во земјава кој веќе една и пол деценија го негува македонскиот музички израз.
Оваа година фестивалската сцена ја исполнија бројни звучни имиња од македонската естрада. На фестивалската сцена настапија: Сузана Спасовска, Душко Ѓоргиевски, Лени Партикова, Круме Спасовски, Методија Столески, Перо Христов, Милица Кузмановска, Ибуш Ибраимовски, Нино Величковски и уште многу други врвни уметници кои ја претставија својата најнова музика.
Македонската публика, како и гледачите пред малите екрани, ќе имаат уникатна можност да уживаат во дури 20 нови композиции, кои оваа година ќе бидат претставени на јубилејното издание на „Лешочки Фолк Фест“. Покрај нив, накратко ќе бидат потсетени и на неколку највпечатливи изведби од минатогодишното издание, со што уште еднаш ќе се нагласи континуитетот и вредноста на овој фестивал.
„Лешочки Фолк Фест“ е фестивал што ја слави македонската песна, културното наследство и традицијата, а секое негово издание претставува празник за сите генерации на љубители на фолк – музиката.
„Лешочки Фолк Фест“ се реализира во соработка со Тетовско–Гостиварската епархија при МПЦ–ОА и Здружението „Источник“. Препознатливо лице на фестивалот и негова уметничка директорка е еминентната пејачка Сузана Спасовска, која со својата енергија и професионализам придонесува фестивалот да се развива во вистински културен амблем на регионот и на целата држава.
Не пропуштајте – овој понеделник, 8-ми септември од 20 часот, празничната вечер поминете ја со најдобрите македонски песни, само на програмата на Балкан Мјузик телевизија.
Текстот го подготви: Иван Јосимовски
