На 16-ти јули, под отворено небо и пред распродаден капацитет, „Инструментал Бенд“ од Битола ја наполни древната Хераклеа со љубов, звук и енергија. Поводот беше јубилеј – 20 години постоење и беспрекорна работа на македонската музичка сцена. Спектакуларниот концертот не беше само прослава, туку и своевидна лекција за тоа како се гради, чува и слави една музичка приказна која трае.
Додека околу 4.000 среќници го следеа концертот од трибините, стотици стоеја, а некои дури и од надвор го слушаа концертот, надевајќи се дека ќе „уловат“ барем дел од магијата.
Сцената – гламурозна. Звукот – совршен. Атмосферата – електризирачка! Секоја чест!
Покрај фантастичниот настап на членовите на „Инструментал Бенд“, вечерта блесна и преку специјалните гости: Ѓоко Јовиќ, Анета Љумаковска, Ламбе Алабаковски, Бојан Стојков, Димитар Андоновски, како и маестралниот композитор Николче Мицевски. Публиката ги пееше сите хитови – во еден глас, со раце во воздух и солзи во очи.
Сцената на Античкиот театар изгледаше како од светска турнеја. Најнова музичка опрема, совршено озвучување и светлосни ефекти што ја осветлуваа Хераклеа како никогаш досега. Сето тоа беше заокружено со врвната продукција и видео реализација на концертот од страна на најдобрите во својата работа – Арт Студио продукција и Балкан Мјузик телевизија, каде што наскоро ќе биде емитуван целиот концерт.
„Постоиме 20 години. Се менуваме и адаптираме на новите трендови, но никогаш не отстапуваме од квалитетот. Кај нас нема импровизации – само посветена работа и љубов кон тоа што го правиме“, велат за Балкан Мјузик членовите на бендот. Тие открија и дека ги очекуваат нови проекти, песни и настапи.
За сите пак кои не беа таму – имате шанса да ја почувствувате атмосферата преку ексклузивната емисија на Балкан Мјузик ТВ. Но, искуството во живо е незаменливо. Следниот пат не си дозволувајте да го пропуштите. По овој концерт, едно е сигурно – „Инструментал Бенд“ не се само група музичари. Тие се феномен. Сила која не избледува. Вистински музички херои на нашето време.
Честитки од Балкан Мјузик телевизија, нека е за многу години!
Подготви: ПР тимот на Балкан Мјузик ТВ
Фото:AS Production
