За време на велигденските празници, кога атмосферата е исполнета со радост, традиција и семејна топлина, македонската публика доби вистинско музичко освежување – нов свадбарски хит кој веќе на прво слушање освојува.
Популарната македонска група „Круна“ ја претстави својата најнова песна со едноставен, но мошне ефективен наслов – „Свекрва си мајко“. Иако насловот асоцира на традиционални семејни приказни, песната носи многу повеќе: енергија, динамика и заразен ритам кој буквално „влече“ на игра.
Зад музиката и аранжманот стои врвниот музичар Инан Неџиповиќ, а резултатот е модерен, брз и исклучително весел звук кој совршено се вклопува во свадбарската еуфорија. Ова е песна која без дилема има потенцијал да стане неизоставен дел од секоја свадба, крштевка или семејна прослава. Она што дополнително го издвојува овој проект е видеоспотот, кој овојпат носи сосема поинаков пристап. Наместо класична продукција, „Круна“ се одлучија за автентична приказна – снимање во вистинска свадбена атмосфера во „Вила Варадеро“ во Скопје. Со тоа, тие успеваат да ја доловат искрената емоција, радоста и магијата на моментите кои остануваат засекогаш запаметени.
За визуелната реализација се погрижија проверените професионалци од Арт Студио продукција и Балкан Мјузик телевизија, кои уште еднаш покажаа дека знаат како да создадат приказна што се гледа и се чувствува.
„Свекрва си мајко“ е осмата авторска песна на „Круна“, официјално објавена токму на Велигден – симболично, во духот на нов почеток и нова енергија. Од групата не кријат дека очекуваат песната брзо да стане дел од задолжителниот свадбарски репертоар низ целата земја.
Но, тука не завршува приказната. „Круна“ веќе најавуваат уште две нови песни до крајот на годината, а во план се и големи меѓународни турнеи во Америка и Австралија, со што јасно ставаат до знаење дека нивната амбиција оди далеку надвор од домашните граници. Со нов репертоар, свежа енергија и полн календар, групата влегува во свадбарската сезона подготвена да направи вистинска атмосфера – онака како што само тие знаат.
Текстот го подготви: Иван Јосимовски
