Некои песни стануваат хитови веднаш. Други, пак, со текот на времето прераснуваат во дел од животот на оној што ги создал. Токму таква е приказната за „Виски“, една од најубавите урбани балади во кариерата на Марјан Коцев, која цели 14 години по своето објавување конечно ќе добие и официјален видеоспот.
Иако не станува збор за нова песна, за Марјан ова е едно од најемотивните музички остварувања. Музиката ја потпишува Николчо Коцев, текстот е на Орце Зафировски, а аранжманот на Дејан Момироски. Видеоспотот е реализиран во продукција на Арт Студио продукција и Балкан Мјузик телевизија, а се снимаше во хотелот „Панорамика“ и на повеќе атрактивни локации низ Скопје.
Но, зад „Виски“ се крие многу повеќе од една животна приказна. Марјан Коцев не крие дека секогаш кога ќе ја слушне „Виски“, се враќа во еден од најтешките периоди од својот живот.
„Виски“ никогаш не престана да биде мојата омилена песна. Ја снимивме пред 14 години, но отсекогаш чувствував дека заслужува видеоспот. Кога ја создававме заедно со брат ми Никола, минувавме низ многу тежок период. Мајка ми беше во болница, сите тие моменти останаа засекогаш врзани за оваа песна. Затоа секогаш кога ќе ја слушнам, ме враќа назад… ме погодува право во срце. Можеби токму затоа толку долго чекав да ја овековечам со видео“, вели Марјан Коцев за Балкан Мјузик.
Токму затоа, видеоспотот не претставува само ново музичко издание, туку и емотивен печат на едно време кое оставило длабока трага во неговиот живот.
Но, тука не завршуваат новостите.
Марјан веќе работи на уште два видеопроекта. Наскоро публиката ќе ја види и новата верзија на „Рајот на земјата“, песна која со години важи за неформална химна на Росоман. Со дозвола и во договор со авторот Ристо Минов, композицијата доби нов аудио-запис, а во тек е и снимањето на видеоспотот. Паралелно, целосно е преснимена и легендарната „Солзи нека пресушат“, песна што Марјан ја изведе на фестивалот „Цветници“ во 1995 година. Следниот чекор е снимање и на видеозапис за оваа безвременска балада.
Во плановите на пејачот е и долгоочекуваното враќање преку Атлантикот. Околу новогодишните празници Марјан Коцев, по пауза од цели 25 години, повторно ќе замине на турнеја во САД, заедно со својот брат Никола Коцев и оркестар од Тетово. А веднаш по тоа, следува уште еден голем проект.
Пред Велигден следната година Марјан планира голем солистички концерт, кој ќе биде симболично музичко патување низ неговата кариера, исполнето со најголемите хитови и песни што оставиле трага кај неколку генерации публика.
„Виски“ можеби е стара 14 години, но токму сега ја добива својата вистинска приказна. Понекогаш, најубавите песни не стареат – тие само чекаат вистински момент повторно да ги допрат срцата.
Текстот го подготви: Иван Јосимовски
Фото: Арт Студио продукција
