Балкан Мјузик – единствената македонска музичка телевизија, и оваа недела повторно приреди незаборавно музичко доживување преку емисијата „На Здравје“. Емисијата, која одамна не е само телевизиска програма туку вистински културен феномен, повторно ги собра најдобрите изведувачи од македонската сцена и им понуди на гледачите и слушателите вечер исполнета со македонска песна, емотивни изведби и богато дружење.
Оваа најнова епизода започна моќно со младиот виртуоз на кларинет, Идает Сејфулов, кој со својата најнова композиција „Испрати ме мајко“ успеа да ја пренесе сета длабочина на македонската музичка душа. Во разговор со домаќинот Орде Неделковски, Сејфулов ја раскажа инспирацијата зад оваа композиција, откривајќи дека ја слушнал песната како дете и почувствувал длабока поврзаност со неа, што го натерало да ја преточи во свој стил и аранжман. За реализацијата на видеото, тој соработувал со Арт Студио продукција и со Менди од Струмица, креирајќи комплетно аудио-визуелно доживување.
Музичкото патување продолжи со групата Круна, кои на уникатен начин ја изведоа „Кога тргнав Цвето во туѓина“, уште една безвременска македонска балада. По нив, на сцената блесна Виолета Пандовска, која со својот препознатлив емотивен израз ја отпеа „Свири ми брате цигане“.
Емилија Иванова ја донесе магијата на македонската класика со изведбата на незаборавната „Молитва“, додека Јованка Јо не остави никого рамнодушен со нејзиното интерпретативно доживување на „Што љубов беше“. Публиката имаше можност да ужива и во настапот на Горан Стоилков, кој ја исполни патриотската „Мајко Македонијо“, а веднаш по него, момците од 4 You Band, заедно со младата и харизматична пејачка, ја разгореа атмосферата со „Ќе те љубам сто години“.
Особено внимание привлече и Елена Андонова, едно од најистакнатите имиња на македонската сцена, која ја изведе „Горда сум Македонска“ – песна која и натаму одекнува со национален дух и гордост. Следуваше и Дане Ќосески со емотивната „За Милица“, а веднаш потоа Чеде Спасиќ ни подари искрена изведба на „Поздрав праќам брате мој“.
За финален подем на атмосферата, повторно се вратија 4 You Band со веселата „Ах Ана“, која ги крена сите на нозе. Како кулминација на вечерта, групата Круна изведе сплет на најпознатите македонски народни песни, кои ја раздвижија целата публика и потсетија на убавината и богатството на нашата традиција.
Како што и започна, и оваа епизода заврши со македонско оро, симболично заокружувајќи уште една прекрасна вечер посветена на она што нè обединува – македонската музика.
До следното дружење со „На Здравје“ – нека е на здравје, и бидете живи и здрави!
Текстот го подготви: ПР тимот на Балкан Мјузик ТВ
