Иако веќе не е физички со нас, гласот и духот на Оливер Драгојевиќ повторно го исполнуваат музичкиот простор. Од денес, на сите стриминг платформи, како и во физичка форма на ЦД, достапен е неговиот нов албум со наслов „Dolaziš“ – издание што содржи дванаесет досега необјавени песни и носи силна емоција за сите што го сакаа и сè уште го сакаат Оливер.
Албумот е навестен преку сингловите „Ne mogu ti reći“ и „Vrime je“, а со себе го носи и новиот насловен сингл „Dolaziš“, заедно со уште девет песни кои совршено го доловуваат препознатливиот сензибилитет, топлина и длабочина на Оливеровиот музички израз.
Особен белег на албумот се и внимателно одбраните музички соработки со имиња кои оставиле печат на регионалната сцена – Теди Шпелат, Маријан Бан, Збор Извор, Клапа Шуфт и Едо Бралиќ. Секоја од песните звучи како искрена посвета и како уште едно „збогум“ што навистина звучи како „се гледаме пак“.
Овој албум не е само нова збирка песни – тој е мост меѓу спомените и вечноста, помеѓу Оливеровата душа и срцата на неговата публика. „Dolaziš“ не е само наслов – тоа е ветување дека музиката никогаш не заминува.
Текстот го подготви: ПР тимот на Балкан Мјузик ТВ
