Најголемата икона на хрватската музичка сцена, легендарниот Мишо Ковач, конечно ќе добие своја голема филмска приказна. Во подготовка е долгометражниот биографски филм со работен наслов „Мишо“, кој ќе ја раскаже животната сага на човекот чии песни станаа химни на емоциите за генерации низ Хрватска и поранешна Југославија.
Филмот ќе го следи Мишо од неговите први чекори, преку блескавата кариера, до денешниот статус на жива легенда. За улогата на Ковач ќе бидат ангажирани неколку актери – за различни фази од неговиот живот – а според неофицијални информации, еден од нив би можел да биде харизматичниот Горан Богдан, во улога што може да му ја одбележи кариерата.
Сценариото го потпишува Милана Влаовиќ-Ковачек, која последните две години темелно ја истражува животната и музичката историја на Ковач, преку разговори со самиот пејач, неговото семејство и најблиските соработници. Нејзиниот тим е засилен со наградуваниот режисер Пјер Жалица, а на режисерската столица ќе седне признатиот Винко Брешан, познат по својот уникатен филмски израз.
„Мишо е херој на нашето време. Неговиот живот е балканска епопеја полна со срце, борба и носталгија“, вели Влаовиќ-Ковачек. А самиот Мишо, скромен како и секогаш, кусо изјави:
„Знам што правеше Брешан во животот… и го почитувам тоа“.
Снимањето започнува кон крајот на летото, а љубителите на музиката, филмот и легендите веќе нетрпеливо го очекуваат првото „стаклено ѕвоно“ на оваа голема киносага.
