На денешен ден, на својот 61-ви роденден, Сузана Спасовска – македонскиот славеј и за многумина единствената „Сузе Национале“ – стои зад себе со кариера што трае речиси четири децении. Таа е уметница која не само што ја модернизираше народната музика, туку и ја претвори во дел од современиот национален идентитет.
Кога се појави кон крајот на 80-тите, Спасовска ја смени сцената засекогаш. Додека фолк-пејачките носеа конзервативни фустани, таа прва воведе високи потпетици, кратки здолништа и смели модни детали – изглед со кој секој нејзин настап стануваше спектакл. Публиката едвај чекаше да види како ќе се појави на „Фолк Фест Валандово“. Брзо ја доби титулата „македонската Мадона на народната песна“.
Но зад тој модерен имиџ, Сузана секогаш ја носеше љубовта кон традицијата. Клучен момент беше настапот со Васка Илиева, која пред својата публика ѝ го довери аманетот да ја продолжи мисијата на македонската народна песна.
Овој завет Спасовска го исполни до крај. За време на тешките моменти во 2001 година, нејзината песна „Гордо Македонијо“ стана неофицијална химна на националниот пркос, а нејзиното име засекогаш се врза со прекарот „Сузе Национале“.
Со над 25 албуми, стотици песни и настапи од Универзална сала до Сиднејската Опера, Спасовска денес е повеќе од пејачка – таа е културен симбол. Низ нејзиниот глас и нејзината уметност живее колективната емоција на еден народ.
Денес, Сузана Спасовска останува вистинска икона на македонската музика, уметница која докажа дека може да биде и револуционерка и чувар на традицијата – и токму во таа двојност се крие нејзината величина.
Среќен роденден!
Текстот го подготви: Иван Јосимовски
