Градот Валандово годинава повторно ќе пулсира во ритамот на македонската музика. Како што објави Општина Валандово, 38-то издание на најголемиот македонски фолк фестивал, Фолк Фест Валандово, ќе се одржи на 25-ти мај (недела) во фестивалската сала „Јанко Узунов“, со почеток во 20:30 часот.
Покрај официјалната фестивалска вечер, љубителите на македонската музика ќе имаат можност да уживаат и во две оф вечери, кои ќе се одржат на градскиот плоштад на 23-ти и 24-ти мај, со почеток во 21:00 часот.
На првата оф вечер, на 23-ти мај (петок), сцената ќе ја запалат Кико Болеро и Болеро Бенд со своите добро познати хитови и препознатлива енергија. Веднаш потоа, на сцената ќе се искачи еден од симболите на македонската народна песна – Сузана Спасовска, која ќе донесе топлина и емоција со своите интерпретации. Вечерта ќе ја затвори несекојдневната и секогаш импресивна Тамара Тодевска, чиј моќен вокал и настапи ја освојуваат публиката секојпат.
Втората оф вечер, на 24-ти мај (сабота), исто така ветува вистинско музичко уживање. Први на сцената ќе излезе Тајзи, кој со својата харизма и урбан звук ќе ја загрее атмосферата. По него следи настапот на вечно насмеаната и позитивна Каролина Гочева, еден од најголемите гласови на македонската поп сцена. За самиот крај, со своја препознатлива енергија, на сцената ќе настапи Ike De Koka, ветувајќи незаборавна забава за сите присутни.
Кулминацијата на овогодишниот фестивал ќе се случи на 25-ти мај, кога во фестивалската сала „Јанко Узунов“ ќе се одржи главната фестивалска вечер. Ќе бидат претставени 22 нови песни, создадени специјално за ова издание, со надеж дека многу од нив ќе станат дел од македонскиот музички репертоар и ќе ги освојат срцата на слушателите.
И оваа година, како и секогаш досега, се очекува Фолк Фест Валандово да биде платформа за промоција на нови музички таленти и за оддавање почит кон богатата македонска музичка традиција.
Со својата долгогодишна традиција, Фолк Фест Валандово останува еден од најзначајните музички настани во земјава, претворајќи го Валандово во епицентар на музиката, љубовта и спомените. Оваа мајска музичка приказна ветува три вечери исполнети со страст, емоции и најдоброто што македонската сцена може да го понуди.
