Со раскошна програма и голема посетеност, вечерва започнува 38-то издание на еден од најзначајните музички фестивали во Македонија – „Фолк Фест Валандово“. Три дена исполнети со емоции, врвни изведби и нови музички приказни ќе го обојат центарот на Валандово, претворајќи го градот во срцето на македонската музичка сцена.
Фестивалот, кој со децении ја негува и развива македонската фолк музика, годинава блеска со обновена енергија, внимателно избрана програма и силна поддршка од публиката. Градскиот плоштад е претворен во голема отворена сцена, каде што љубителите на музиката ќе имаат можност да уживаат во настапите на најпознатите домашни артисти и нови ѕвезди во подем.
Вечерва 23-ти мај (петок), точно во 21 часот, свеченото отворање ќе го означи настапот на Кико Болеро и Болеро Бенд, кои со својот препознатлив звук ќе ја загреат публиката на Градскиот плоштад во Валандово. Потоа следи настапот на Сузана Спасовска, дама со длабок корен во македонската фолк музика, која уште еднаш само ќе ја докаже својата вокална супериорност. А вечерта ќе кулминира со настапот на Тамара Тодевска, чии современи аранжмани и моќна интерпретација веруваме ќе ја воодушеви валандовската публика.
Утре 24-ти мај (сабота) ќе биде вечер на современата фузија и младешкиот дух, каде што ќе настапат харизматичниот Тајзи, вечно насмеаната Каролина Гочева и енергичните Ike De Koka, во спектакл кој ветува незаборавна атмосфера.
Кулминацијата на овогодишното издание ќе се случи на 25-ти мај (недела), кога ќе бидат презентирани 22 нови фестивалски песни. Во духот на традицијата, овие композиции се инспирирани од македонското мелодиско и текстописно богатство, а истовремено претставуваат современ пристап кон фолк жанрот. Многу од нив имаат потенцијал да станат идни хитови, кои ќе се пеат на концерти, слави и радосни семејни настани низ целата земја.
Со три децении и осум години зад себе, „Фолк Фест Валандово“ останува еден од најсилните бастиони на македонската музичка традиција. Овој фестивал не само што промовира нови автори и изведувачи, туку активно ја зачувува културната меморија на народот. Секоја година, илјадници посетители од Македонија и дијаспората доаѓаат во Валандово за да ја почувствуваат магијата на живата музика, хармонијата и националниот дух.
