Во текот на вчерашниот ден, познатата македонска фолк пејачка Татијана Стефановска го промовираше најновиот видеоспот за песната „Песна е чарето“, која премиерно беше изведена на минатогодишното издание на фестивалот „Прилеп Фолк Фест“. Видеото е објавено на нејзиниот официјален YouTube канал, во соработка со најдобрите – Арт Студио продукција и музичката телевизија Балкан Мјузик.
Композицијата е дело на композиторот Дејан Момировски, а текстот го потпишува етаблираниот текстописец Борче Нечовски – тандем кој веќе има докажана хемија на македонската музичка сцена.
„Оваа песна има ведрина, има ритам, има дух. Сакавме да почекаме погоден миг за да снимиме визуелно парче што ќе ѝ одговара на енергијата на композицијата и успеавме во тоа. Спонтаниот тек на настаните некако ни донесе сè што ни требаше“, изјави Стефановска за Балкан Мјузик.
Инаку, видеоспотот е снимен на неколку специфични и инспиративни локации во Охрид – вклучувајќи ги автентичните улички од стариот дел на градот, крајбрежјето во центарот со играорците од КУД „Филиграни“, како и сцена со зајдисонцето над Канео снимена од висока карпа што внесува особена магија и визуелна длабочина.
Летниот период за Татијана Стефановска е исполнет со настапи, мини-концерти и патувања низ Македонија. Освен професионалните обврски, пејачката активно го користи времето за заслужен одмор заедно со своето семејство – најчесто во Охрид и околните туристички места.
По објавата на видеоспотот за „Песна е чарето“, таа најавува уште една нова песна што наскоро ќе ја претстави со видеоспот, а паралелно подготвува и настап на домашен музички фестивал.
Со оваа песна и видеоспот, Стефановска уште еднаш потврдува дека е глас кој носи традиција, а сепак е отворен кон нови уметнички облици. „Песна е чарето“ има голем потенцијал да стане летен хит на македонската музичка сцена и да ја зацврсти нејзината позиција меѓу најавтентичните изведувачи на народна музика кај нас.
Текстот го подготви: ПР тимот на Балкан Мјузик ТВ
