И оваа недела, популарната музичко-забавна емисија „На Здравје“ ги собра на едно место најубавите звуци, доброто расположение и македонските музички таленти. Под водство на харизматичниот Орде Неделковски и неговата верна Група Круна, телевизиската публика уживаше во уште една вечер исполнета со емоции, традиција и жива музика.
Епизодата започна енергично со Група Еуфорија од Битола, кои ја отворија вечерта со „Свири ми брате цигане“, поставувајќи го темпото за она што следуваше. Веднаш потоа, шармантната Андријана Ацевска – Андријана Кеш, го освои студиото со својата интерпретација на класиката „Во бело“.
Во вистински „На Здравје“ дух, една по една се редеа песните, а секој изведувач внесе свој белег во вечерта. Жаклина Узунова и Група Круна со емотивната „Каде си тргнала Кито“, а потоа и Ташко Каранфилоски со „Распукала Шар Планина“ дополнително ја разбудија публиката.
Мартин Милошевски уште еднаш докажа зошто е миленик на народот, пеејќи ги „Ајде камен Јано“ и подоцна „Свирете ми еј свирачи“, додека Ангела Стевковска внесе ведрина со песната „Пусти ти биле меаните Иле“.
Во продолжение, Бобан Цаневски го оживеа духот на македонската традиција со „Сношти минав покрај Вази“, а Марија Петковска не потсети дека среќата не се мери со пари. Ташко Каранфилоски повторно се врати на сцената со песната „За Кристина“.
Кон крајот на вечерта и ова дружење, емоциите се заокружија со Љупчо Јовановски Бубе, кој ја изведе неговата „Насмевни се за збогум“, по што домаќинот Орде Неделковски со својата Група Круна ја отпеа емотивната „Седнав да вечерам“.
За кулминација на вечерта, како вистинска „јаготка на шлагот“, се погрижи Маестро Влатко Ѓоргиев, кој со македонската гајда создаде магија и достојно ја заврши оваа прекрасна епизода.
Со нетрпение ја очекуваме следната недела – до следното „На Здравје“ – нека е На Здравје!
