Во свет каде годините често се доживуваат како граница, Добрила Чабриќ Ивановска ги руши сите стереотипи – со глас, волја и срце што уште пулсираат со младешка енергија. На 97 години, таа не само што сè уште пее и снима нови песни, туку и самата вози автомобил, патува сама до Белград и – ужива во својот омилен хоби: казиното.
Победничка на регионалното музичко шоу „Никогаш не е доцна“, Добрила е повеќе од талент – таа е симбол на непокор, хумор и живост. Оние што ја слушнале барем еднаш, ја паметат по гласот што не старее и по енергијата што заразува. Таа не застана по победата – сцената ѝ остана дом, а публиката – постојан партнер.
Неверојатно, но вистинито: Добрила сè уште самата го вози автомобилот. Патувањата од нејзиниот роден Дојран до Белград не се ништо ново. Сцените кога таа излегува од колата, ведра и подготвена за настап или интервју, често предизвикуваат аплауз и восхит.
„Возењето ми е како кафе наутро – едноставно ми припаѓа“, вели таа со насмевка што веднаш ве разоружува. А кога ќе проговори за мажите? „Се лепат за мене како болви“, вели низ смеа. Нејзиниот хумор и искреност се заразни, а нејзината виталност – инспирација за сите генерации.
Далеку од пороци, таа живее здраво – со многу овошје, зеленчук и салати, додека месо јаде ретко. Не пуши, не пие, освен – „понекогаш, со друштво“, вели таа, опишувајќи ја сцената со хумор: „како кога на пиле ќе му ставите цуцла“.
Живее во својата стара куќа во Дојран, купена уште во 1970 година, опкружена со миленичиња и неколку спомени од љубовите што ги носи во срцето. Додека повеќето нејзини врсници одамна се повлекле во тишина, Добрила останува будна до раните часови – жедна за живот, за смеа, за сцена.
„Сè уште сакам да излегувам, да се смеам и да живеам на максимум“, вели. И навистина, таа живее како песна – која не сака да заврши, туку само менува ритам.
