Во срцето на Струмица, каде што музиката е дел од секојдневието, а спомените за великани сè уште одекнуваат меѓу улиците, „Легато бенд“ создаде нешто повеќе од концерт – создаде музички мост помеѓу генерациите. Со посветеност и љубов, тие му оддадоа почит на својот сограѓанин и македонска музичка легенда – Гоце Арнаудов.
Пред споменикот на Арнаудов во Малиот градски парк, се случи едно несекојдневно музичко доживување – видео проект кој ги спојува старите вредности со современиот звук. „Легато бенд“ одбра девет од највпечатливите композиции од неговото творештво, и со нов аранжман, но со автентична душа, им даде нов живот.
Овој проект не е само техничка реконструкција на хитовите, туку вистинска емоционална реконекција со делото на човекот кој остави неизбришлива трага во македонската музика.
Видео проектот, во продукција на најдобрите, Арт Студио продукција и Балкан Мјузик ТВ, плени со својата искреност, квалитетна аудиовизуелна продукција и интерпретативна зрелост на членовите на бендот. Публиката ќе има можност наскоро да го следи емитувањето на проектот на нашата музичка телевизија – Балкан Мјузик, со што песните на Гоце Арнаудов ќе допрат до уште поширока публика – и во Македонија и пошироко на Балканот.
„Сакавме да направиме нешто што не само што ќе го слави неговото дело, туку и ќе го направи живо, актуелно. Секоја нота ја изведувавме со мислата на неговата душа, неговата енергија“, велат од „Легато бенд“.
Проектот има и документарна вредност – локацијата не е случајна. Проектот е снимен токму таму каде што сега стои споменикот на Гоце Арнаудов – како симболичен музички дијалог помеѓу него и неговите сограѓани.
Ова и не е само видео-проект. Ова е спомен, благодарност, и инспирација за новите генерации.
Текстот го подготви: ПР тимот на Балкан Мјузик ТВ
