Како што дознава Балкан Мјузик телевизија, на убавиот македонски празник Митровден, познатата македонска фолк пејачка Елена Јовческа доби ќерка! Радоста е огромна, а Елена не го крие своето воодушевување и среќа што конечно го дочекала најубавиот момент во животот – моментот кога станала мајка.
Во изјава за Балкан Мјузик, Елена со трепет во гласот откри дека породувањето поминало прекрасно и дека нејзиното срце сега чука побрзо од кога било:
„Ова е најубавиот ден во мојот живот. Среќата е неизмерна, а зборови навистина нема што можат да ја опишат оваа емоција. Благодарна сум на целиот медицински тим кој беше со мене во секој момент, изјави Елена, ексклузивно за Балкан Мјузик.
Пејачката упати и голема благодарност до доктор Татјана Гужарова од „Њу Борн“ клиниката, како и до екипата на клиниката „Жан Митрев“, како и до докторот Саша Јовчевски и неговата неуморна и вредна екипа, каде што се случи породувањето. Со нивна грижа и професионалност, малата ѕвездичка Талија безбедно пристигна на светот, носејќи голема радост во семејството Јовчески.
Малата Талија веќе ги освои срцата на сите блиски, а Елена со насмевка вели дека името го избрала одамна – симболично, по музата на радоста, убавината и уметноста.
„Сакав моето дете да носи име со посебна енергија, нешто што ќе ја инспирира низ животот. Талија е мојата најголема песна,“ додава гордо пејачката.
Екипата на интернет порталот и телевизијата Балкан Мјузик ѝ посакува на Елена и нејзиното семејство многу љубов, здравје и среќа, а на малата Талија – да расте во хармонија, музика и љубов, исто како својата мама.
Честито породување, Елена! Македонија се радува со тебе!
Текстот го подготви: Иван Јосимовски
