Легендарниот пејач Халид Бешлиќ е префрлен на специјализирана онколошка клиника, каде што прима континуирана терапија и е под постојан надзор на медицински тимови. Неговиот менаџер, Недим Срња, ја увери јавноста дека состојбата му е стабилна и дека има јасни знаци на подобрување.
Со ова се стави крај на шпекулациите кои се појавија претходните денови дека Бешлиќ бил отпуштен од болница и дека неговото здравје драматично се влошило. Тимот на пејачот појасни дека станува збор за префрлување во нова установа како дел од предвидениот план за лекување, а не за напуштање на болничкиот третман.
„Халид моментално прима терапија на онколошка клиника и се чувствува добро. Напредокот е очигледен, а гласините за отказ на органи се целосно неосновани“, изјави менаџерот Срња.
Во моментов фокусот е на постепено враќање на силите, следење на сите параметри и адаптација на терапијата. Според блиските на пејачот, таквиот режим е вообичаен за состојби кои бараат подолгорочна проценка и внимателен пристап.
Тимот на Бешлиќ апелира до јавноста да се потпира исклучиво на официјални информации и да се избегнува сензационализам кој може дополнително да создаде непотребен притисок. Поддршката на публиката, велат тие, е важна, но уште поважно е да се почитува приватноста и чувствителноста на моментот.
Како што беше најавено, сите нови информации поврзани со неговата здравствена состојба ќе бидат споделувани преку официјални канали, во согласност со препораките на лекарите и блиските на пејачот.
Текстот го подготви: Иван Јосимовски
