Во топла, семејна атмосфера, исполнета со музика, пријателство и искрени емоции, „Група Круна“ вчера го прослави својот петти роденден во новиот дом на Џељо Дестановски. Празникот помина онака како што доликува на оваа прекрасна екипа – со песна, насмевки и искрена благодарност за сите убави моменти што групата ги создаде во изминатите пет години.
Иако е млада по години на постоење, „Група Круна“ за кратко време стана симбол на добра забава, професионализам и музички квалитет. Основана од Орде Неделковски и Џељо Дестановски, групата уште од самиот почеток функционира како вистинско семејство – „рамо до рамо“, како што велат и самите фронтмени. Со братска слога и посветеност, тие успеаја да изградат бренд што денес има свое место не само на македонската, туку и на балканската музичка сцена.
Во составот на „Група Круна“, покрај основачите, се и Али Махмудов, Влатко Китаноски, Горан Мирковски, како и најновиот член – Иван Трајковски. Заедно, овие музичари создадоа бројни хитови кои веќе станаа дел од секоја прослава: „Ти си ми се“, „Свадба ќе правиме“, „Наде, моме убаво“, „Бекрија“, „Мајко“, „Ајде Џељо мајсторе“ и „Ние сме Македонци“ – песни кои не само што ги обележуваат нивните настапи, туку се пеат и од публиката низ целиот Балкан, Европа, Австралија и Америка.
„Велат – сложни браќа куќа градат, и навистина, ние со многу љубов и труд ја изградивме оваа наша музичка куќа, „Група Круна“, велат Орде и Џељо.
Само еден ден по роденденот, членовите на групата повторно се вратија во студио – каде што започна работата на нова песна, ветување кое му го дадоа на своето верно следбеништво.
„Благодарни сме на Бога за хармонијата и енергијата што владее меѓу нас. Се надеваме дека ова е само почеток и дека ќе дочекаме уште многу јубилеи – зошто да не, дури и 50 години постоење,“ порачуваат од групата.
Со постојани настапи, нови проекти и безрезервна љубов кон музиката, „Група Круна“ не застанува тука. Напротив – продолжува во истото темпо, со уште поголема инспирација, решена да ја чува и негува македонската култура и традиција преку песната и орото.
Текстот го подготви: Иван Јосимовски
