Уште како мало момче низ кавадаречките чаршии бил вистинска атракција. Трговците го качувале на маса, му подарувале бонбони и со насмевка го молеле да запее. Никој тогаш не можел ниту да претпостави дека детето со кадифениот глас еден ден ќе стане еден од најголемите амбасадори на македонската народна песна. На само десет години започнал да свири виолина, потоа пеел во градскиот хор, играл во фолклорна група, а вечерите ги минувал на серенади, впивајќи ја магијата на народната музика. Таа љубов подоцна ќе се претвори во животна мисија.
Во септември годинава се навршуваат 50 години од смртта на Никола Бадев (1918–1976) – уметникот кој со својот неповторлив глас им даде душа на најубавите македонски народни песни. Зад себе остави богато музичко наследство, стотици снимени композиции и грамофонски плочи, илјадници концерти и настапи низ Македонија, поранешна Југославија и многу земји во светот.
„Песната е мојот живот, живеам за неа и преку неа“, биле зборовите што најдобро ја опишувале неговата животна филозофија.
Никола Бадев не бил само извонреден интерпретатор. Тој бил чувар на македонскиот музички идентитет. Со неговата исклучителна интерпретација, емоција и автентичен вокал, народните песни добиле нов живот, а многу од нив токму преку него станале безвременски.
И денес, кога се зборува за најголемите имиња на македонската народна музика, Никола Бадев неизбежно се споменува рамо до рамо со Александар Сариевски, Јонче Христовски и Васка Илиева. Тоа е квартетот што постави темели врз кои се гради современата македонска народна музика. Колку бил голем сведочи и фактот што четири години по неговата смрт, во 1980 година, Васка Илиева ја снимила песната „Песна за Никола Бадев“, како музички поклон на човекот чиј глас остана да живее во колективната меморија на Македонија.
Педесет години по неговото заминување, песните на Никола Бадев сè уште одекнуваат на семејните веселби, концертите, радиобрановите и во домовите на илјадници Македонци. Времето не успеа да го избрише неговиот печат – напротив, само потврди дека вистинските уметници не заминуваат. Тие продолжуваат да живеат секогаш кога ќе засвири македонската песна и ќе се запее од срце.
Затоа Никола Бадев не е само дел од музичката историја. Тој е дел од македонската душа.
Текстот го подготви: Иван Јосимовски
