Поп-пејачот Влатко Лозаноски – Лозано со видлива возбуда ја одбројува неделата до големиот концерт на 7-ми март во СЦ „Борис Трајковски“, ветувајќи вечер што, како што вели, нема да наликува на ниту една претходна. На вчерашната прес-конференција пред седмата сила во Скопје, пејачот откри дека салата е речиси исполнета, информација што, според него, му дава дополнителен мотив и одговорност.
„Ме информираа дека салата е речиси полна и тоа најмногу ме радува“, рече Лозано, нагласувајќи дека публиката е неговата најголема инспирација.
Концертот ќе донесе освежени верзии на дел од неговите најголеми хитови, но и сосема нов материјал. Лозано најави нови аранжмани на неколку стари песни, како и премиерна изведба на нов сингл, чиј тизер веќе беше прикажан пред новинарите. Песната официјално ќе биде објавена на почетокот на март.
„Работиме секојдневно со бендот. Сакам ова да биде вечер што ќе се памети, не само концерт, туку вистинска претстава“, изјави тој, додавајќи дека сцената, светлото и движењето ќе играат подеднакво важна улога како и музиката.
На сцената ќе му се придружат и специјални гости, а во наредните денови се очекува да бидат објавени и неколку нови дуети. Дел од шоуто ќе биде и танчарското студио „Бах“ од Струга, кое ќе внесе дополнителна динамика и визуелен ефект во неколку од песните. По успехот на синглот „Купи ме“, Лозано најави дека новиот спот ќе биде уште поквалитетен и продукциски помоќен. Тој јавно ѝ се заблагодари на екипата што работела на претходниот проект, потенцирајќи дека континуирано вложува во визуелниот идентитет на својата музика.
Менаџерот Васко Спасоски најави „романтична вечер со многу изненадувања“, потенцирајќи дека се работи на концепт што ќе ги спои добриот звук, врвната сцена и силните емоции во едно заокружено шоу. Лозано откри дека концертот на 7-ми март го гледа како нов почеток.
„По овој концерт ќе продолжам со нови сили. Ова ќе ми биде поттик за други концерти низ Македонија“, рече пејачот.
Билетите за концертот се достапни преку мрежата на Купи карта, а со оглед на интересот, организаторите апелираат љубителите на неговата музика навреме да си обезбедат место. Со најавата за „претстава“ наместо обичен концерт, Лозано јасно става до знаење дека на 7-ми март публиката ја очекува повеќе од музичка вечер – спектакл што ќе ги спои звукот, сцената и емоцијата во едно големо, разиграно шоу.
Текстот го подготви: Балкан Мјузик телевизија
