Вчера вечер во познатиот македонски ресторан „Камин Кама“ се одржа прес-конференција на една од најпрепознатливите македонски фолк пејачки – Лени Партикова, по повод нејзиниот претстоен трет солистички концерт кој ќе се одржи на 17 јануари 2026 година, во Домот на културата во Тетово.
Пред присутните новинари, пријатели, соработници и колеги, Лени застана рамо до рамо со својот сопруг Жарко Ѓоргески, испраќајќи силна порака за поддршка, заедништво и семејна хармонија. Во улога на водител на прес-конференцијата беше познатата радио водителка Билјана Коцева – Алексова, или попозната во јавноста како DJ Bici, од најслушаното скопско музичко радио Зона М1.
Во опуштена и пријатна атмосфера, Бици го отвори настанот, нагласувајќи го поводот за собирот и најавувајќи го концертот, но и новиот студиски албум на Лени – „Горда сум Македонка“, кој воедно беше и официјално промовиран на прес-конференцијата.
Иако веќе е познато кои ќе бидат гостите на концертот (Група Круна, Орде Неделковски, Кире Науновски, како и Трубачкиот Оркестар Мануел Аметовиќ – прваци на Гуча од Србија и КУД „Шара“ од Тетово), организаторите открија дека публиката ја очекува уште едно специјално изненадување, кое засега останува тајна и ќе биде откриено токму на концертната вечер.
Лени за време на пресот неколкупати запеа, се фотографираше со присутните, а новинарите имаа можност да го погледнат и видеоспотот за истоимената песна „Горда сум Македонка“, реализиран во продукција на Арт Студио продукција и Балкан Мјузик телевизија.
По официјалниот дел, присутните беа почестени со мала закуска, а атмосферата продолжи во духот на музиката, дружењето и позитивната енергија.
До концертот во Тетово остануваат уште многу малку денови, а за сите оние кои сè уште немаат обезбедено билет – картите се во продажба и се во ограничен број, па интересот е повеќе од очигледен.
На 17 јануари, Тетово ќе биде домаќин на една музичка вечер исполнета со емоции, традиција и гордост, во знакот на Лени Партикова.
Текстот го подготви: Иван Јосимовски
