Познатата македонска фолк пејачка Анета Љумаковска деновиве се наоѓа во Рим, Италија, каде што заедно со својата внимателно одбрана екипа и екипата на Арт Студио продукција снимаат видеоспот за својата најнова песна со наслов „Жена“.
Проектот е резултат на соработка со врвни професионалци — Дејан Ѓоргиев и Давид Стојковски од Арт Студио продукција, како и со Балкан Мјузик телевизија, кои се грижат приказната на песната да оживее во визуелен формат полн со емоција и стил.
Авторскиот тим зад песната е подеднакво импресивен: текстот е на Анита Даева, музиката и аранжманот ги потпишува Дејан Момироски од XL Studio, додека визуелниот идентитет на спотот се создава на неколку препознатливи локации во срцето на Рим.
Анета не го крие своето задоволство од снимањето и соработката, изразувајќи искрена благодарност до целиот тим за нивната професионалност, креативност и посветеност:
„Со нивната енергија и уметнички пристап, секој момент од снимањето стана вистинско уживање. Ви благодарам што со својата визија и талент ја преточивте емоцијата на песната во слика“, изјави Љумаковска.
Со „Жена“, пејачката Љумаковска најавува ново поглавје во својата музичка кариера, со посилна порака и изразена емоција која, како што вели, „ја раскажува силата, чувствителноста и убавината на секоја жена“.
Премиерата на видеоспотот се очекува наскоро, а публиката веќе со нетрпение го очекува новиот визуелен и музички бисер од Анета Љумаковска.
Текстот го подготви: Иван Јосимовски
