На 27-ми август (среда), во пресрет на големиот христијански празник Успение на Пресвета Богородица, манастирскиот комплекс „Св. Атанасиј“ и „Пресвета Богородица“ повторно се претвори во сцена на духовност, традиција и музика. Јубилејното, петнаесетто издание на „Лешочки Фолк Фест“ уште еднаш го потврди својот статус на еден од највпечатливите фолклорни настани во Македонија.
Во магичната вечер, кога летото полека ѝ го предава своето место на есента, Лешок пулсираше во ритамот на песната, исполнувајќи го просторот со македонска душа и заедништво. На сцената настапија внимателно одбрани вокални уметници кои ја оживеаја традицијата преку нови композиции, инспирирани од лирски, печалбарски и родољубиви теми.
Меѓу познатите македонски фолк изведувачи, годинава настапија: Круме Спасовски, Методија Столески, Перо Христов, Лени Партикова, Душко Горгиевски, Милица Кузмановска, Ибуш Ибраимовски, Нино Величковски, Сузана Спасовска и уште многу други. Со нивните настапи фестивалската вечер доби посебна тежина, комбинирајќи иконични рефрени со нови песни создадени во духот на македонската традиција.
Фестивалот е организиран во соработка со Тетовско–Гостиварската епархија при МПЦ–ОА и Здружението „Источник“, а неговите препознатливи лица – уметничката директорка Сузана Спасовска и долгогодишниот соработник Борче Брзанов – веќе 15 години посветено ја градат оваа уникатна музичка традиција.
„Лешочки Фолк Фест“ одамна ја надмина рамката на обичен фестивал. Тој стана место каде што песната се претвора во молитва, каде што музиката добива духовна димензија, а публиката има ретка можност да се стопи со тивката убавина на манастирските храмови, да запали свеќа и да ја подели радоста со заедницата.
Посетителите уживаа во нови фолк рефрени создадени во духот на македонската традиција, но и во ревијалниот дел, каде младите таленти застанаа рамо до рамо со веќе афирмираните музичари. Со тоа фестивалот уште еднаш ја потврди својата улога на „музички расадник“, каде што се негуваат и создаваат нови ѕвезди на македонската сцена.
Оваа година, Балкан Мјузик Телевизија беше медиумски покровител на фестивалот, кој заедно со Арт Студио продукција го сними и реализира настанот. „Лешочки Фолк Фест“ дополнително ќе се емитува на ТВ-програмата на музичката телевизија – Балкан Мјузик телевизија, овозможувајќи и на оние кои не беа во Лешок да ја почувствуваат атмосферата.
Влезот беше бесплатен, а интересот огромен – илјадници љубители на музиката и верниците ја исполнија духовната порта на Лешок, претворајќи го просторот во вистинско море од народ и песна.
На крајот на вечерта, традиционално, одекна пораката која се пренесува од генерација на генерација: „Нека е за многу години Лешочки Фолк Фест!“.
Текстот го подготви: Иван Јосимовски
