Најубавата летна сцена во Македонија, „Долни Сарај“ во Охрид, и оваа година ќе биде домаќин на едно од најпрестижните музички случувања во регионот – „Охрид фест – Охридски трубадури 2025“, фестивал кој веќе 32 години успева да ја обедини музиката, културата и туризмот во едно незаборавно доживување.
Фестивалот ќе се одржи на 29-ти и 30-ти август, со директен пренос на ТВ Алфа – новиот стратешки медиумски партнер, кој заедно со уште неколку регионални телевизии ќе придонесе за уште поголема видливост на настанот и во регионот и во дијаспората.
Настанот традиционално ќе започне со петминутна разгледница за Охрид, која ја претставува убавината на Балканот и магијата на охридското езеро.
„Охрид фест“ одамна не е само музички настан, туку платформа за млади таленти, признание за големите имиња и вистинска алатка за промоција на македонскиот туризам“, истакна уметничкиот директор Григор Копров.
Првата вечер – Фолк вечерта (29 август) – ќе донесе настапи на врвни македонски фолк изведувачи, додека втората, Интернационалната вечер (30 август), ќе ја збогати охридската сцена со ѕвезди од Македонија и Балканот. Меѓу нив се Сузана Спасовска, Бојана Скендеровски, Сашо Гигов – Гиш, Ана Петановска, Нино Величковски, Благоја Грујовски, Бојан Маровиќ, како и српскиот евровизиски претставник Принц од Врање.
Посебно внимание предизвикува најавата за специјалниот гостин – легендарниот Оливер Мандиќ, чиј настап ќе ја заокружи магијата на фестивалот и ќе го зголеми неговото културно значење.
По повеќе од три децении постоење, „Охрид фест“ останува културна мисија, сцена каде што се спојуваат генерации и се создаваат нови музички приказни. Охрид повторно ќе пее – а целиот Балкан ќе слуша.
Текстот го подготви: Иван Јосимовски
