На самиот праг на крајот од летото, кога во воздухот веќе се чувствува мирисот на есен, Лешок повторно ќе пулсира во ритамот на песната и духовноста. На 27-ми август, понеделник, со почеток во 20 часот, манастирскиот комплекс „Св. Атанасиј“ и „Пресвета Богородица“ ќе ги отвори портите за јубилејното, петнаесетто издание на „Лешочки Фолк Фест“.
Овој фестивал, познат по својата уникатна комбинација на живописен амбиент, духовна атмосфера и автентична македонска песна, и оваа година ќе донесе на сцена низа врвни вокални уметници. Настанот ќе се одржи во пресрет на големиот православен празник Успение на Пресвета Богородица – во народот познат како Голема Богородица – со што музиката ќе добие дополнителна духовна димензија.
Организиран во соработка со Тетовско–Гостиварската епархија при МПЦ–ОА, фестивалот е дело на Здружението за негување на македонскиот фолклор и традиција „Источник“. Неговите препознатливи лица – уметничката директорка Сузана Спасовска и нејзиниот долгогодишен соработник Борче Брзанов – веќе 15 години неуморно ја чуваат и развиваат лешочката музичка традиција, создавајќи амбиент што е истовремено и народен и свечен.
Со текот на годините, „Лешочки Фолк Фест“ прерасна во сцена на која се изведуваат нови македонски песни инспирирани од лирски, печалбарски и родољубиви теми. Фестивалот има и ревијален карактер, но и улога на „музички расадник“, нудејќи простор на младите таленти да застанат рамо до рамо со веќе афирмираните уметници.
И оваа година, посетителите ќе имаат прилика да слушнат нови фолк рефрени создадени во духот на македонската традиција, изведени од добро познати и внимателно одбрани имиња од домашната музичка сцена. Влезот е бесплатен и сите верници, љубители на музиката и добронамерници се добредојдени. Ова е можност не само да се ужива во песната, туку и да се влезе во тивката духовна убавина на манастирските храмови, да се запали свеќа, да се упати молитва и да се подели радоста со заедницата.
Како и секоја година, фестивалот ќе заврши со порака што се пренесува од генерација на генерација: „Нека е за многу години „Лешочки Фолк Фест“.
Текстот го подготви: ПР тимот на Балкан Мјузик ТВ
