На 2 август, Илинден – симболот на македонската непокорност и слобода – Група Круна ја претстави својата најнова песна „Ние сме Македонци“, дело што го возбуди срцето на народот и ја разбуди емоцијата што одамна чекаше да биде искажана. За само неколку дена, песната предизвика лавина реакции и речиси 8.000 прегледи на YouTube, со коментари полни благодарност, солзи и гордост.
Ова не е обична песна. Ова е крик од душата, глас на цел еден народ, приказна за идентитет, чест и љубов што се пренесува низ генерации. „Ние сме Македонци“ е звучна химна на припадноста, музички аманет за иднината, и емотивна почит кон минатото.
Автор на текстот е Орце Стефковски, чии зборови полни со љубов и решителност ве оставаат без здив. Џељо Дестановски и Горан Мирковски стојат зад музиката, миксот и мастерингот, а аранжманот е збогатен со зурла, кавал и тапан што го носат духот на Македонија низ вековите. Тамбурите на Христо Јаневски ѝ даваат на композицијата огнена душа – силна, дива и горда, како Македонија.
Видеоспотот, дело на Арт Студио Продукција и Балкан Мјузик телевизија, е снимен на неколку од најзначајните и најсвети локации за македонската историја: Баргала (Штип), Спомен-куќата на Кочо Рацин и Споменикот на Гемиџиите (Велес), Македониум и Мечкин Камен (Крушево) и Манастирот Трескавец (Прилеп). Секоја сцена носи симболика, длабока врска со народот и приказна што не се заборава.
„Ова е глас на сите Македонци, без разлика каде се наоѓаат. Ова е наше огледало, наш аманет, наш отпор и наш идентитет“, велат од Група Круна.
Во време кога зборовите чест, припадност и идентитет добиваат сè подлабоко значење, оваа песна доаѓа како одговор, потсетник и инспирација. За нашите предци. За нас денес. И за оние што доаѓаат.
Погледнете го видеото и почувствувајте ја Македонија:
Текстот го подготви: ПР тимот на Балкан Мјузик ТВ
