Освен веќе најавените содржини кои публиката има можност да ги проследи во текот на денешниот празничен ден, музичката телевизија Балкан Мјузик продолжува со својата богата празнична програма и утре, 3-ти август, нудејќи уште неколку ексклузивни музички концерти кои несомнено ќе го привлечат и задржат вниманието на гледачите.
Празничната програма започнува во 13 часот со големиот скопски концерт на познатата македонска група Некст Тајм, ексклузивно само на Балкан Мјузик телевизија. Овој концерт снимен пред преполна сала во Скопје, е исполнет со силни емоции, енергија и автентична музика. Браќата Стефан и Мартин не само што приредија вистинско музичко доживување, туку уште еднаш ја потврдија својата безвременска поврзаност со македонската публика.
Празничната вечерна програма продолжува во 22 часот со ексклузивно емитување на концертот на познатиот македонски фолк пејач Николче Симоновски Јошка, кој веќе долги години живее и работи во далечната Австралија. Овој концерт е ретка можност за македонската публика да ужива во неговата изведба, претпознатлива по длабоки емоции, традиционален фолк звук и автентична поврзаност со корените.
Со оваа празнична програма, Балкан Мјузик телевизија уште еднаш ја потврдува својата посветеност во негување на македонската музичка традиција и поддршка на уметниците, без разлика каде се во светот.
Текстот го подготви: ПР тимот на Балкан Мјузик ТВ
