Групата Плетенка од Битола, која веќе десет години неуморно ја негува македонската народна музика, оваа сабота, на 12-ти јули, ќе го прикаже својот ексклузивен концерт снимен во живо во Битола. Со почеток во 20:00 часот на единствената македонска музичка телевизија Балкан Мјузик, гледачите ќе имаат ретка можност и привилегија да уживаат во уникатната изведба на нивниот репертоар составен од авторски песни, познати народни мелодии и евергрини од нашата музичка сцена.
Составена од шест талентирани музичари – Марко Трпчевски (вокал), Ема Јовановска (вокал), Спире Јовановски (дувачки инструменти), Владо Димовски (клавијатури), Валентин Кубуровски (хармоника) и Трајче Ивановски (ударни инструменти) – групата Плетенка зад себе има богата историја на настапи и музички остварувања. Во своето децениско постоење тие настапувале на реномирани фестивали како „Фолк Фест Валандово“, „Роса фест“, како и на бројни хуманитарни концерти и културни манифестации низ Македонија, вклучително и концертот посветен на ликот и делото на Киро Ангелески.
Групата досега има издадено ЦД со осум композиции од реномирани македонски композитори, меѓу кои се Ристо Краповски, Златко Миладиновски и Зоранчо Здравевски – Зрпе. Моментално работат на два нови музички проекти, од кои едниот е токму овој концерт – снимен во Културно-информативниот центар Битола во соработка со Арт Студио продукција од Скопје. Покрај сценските настапи, Плетенка е и чест избор за фамилијарни веселби низ целата држава, каде преку жива музика, топла интерпретација и автентичен пристап остава траг во срцата на публиката.
И не заборавајте, оваа сабота со почеток во 20:00 на Балкан Мјузик телевизија – не пропуштајте го концертот на Плетенка. Со искрена емоција и љубов кон македонската традиција и посветеност на македонскиот музички идентитет, тие носат вечер исполнета со музика, игра и гордост. Вклучете се – запејте и заиграјте заедно со нив – бидејќи ова не е само концерт, туку славење на македонската душа низ музика.
Текстот го подготви: ПР тимот на Балкан Мјузик ТВ
