По повеќегодишно музичко патување исполнето со љубов кон уметноста и истражување низ различни жанрови, реномираниот пејач и автор Блаж Маротов најавува ексклузивна концертна вечер која ветува незаборавно музичко доживување.
На 22 април 2025 година, со почеток во 20:00 часот, во малата сала на Македонската филхармонија, ќе се одржи романтичен концерт со оригинална авторска музика, придружен од неговиот бенд и специјални музички гости. Настанот ќе биде интимно патување низ емоции, звуци и приказни, каде покрај сопствените композиции, ќе бидат изведени и добро познати песни од македонскиот и поширокиот балкански простор.
„Иако живееме во време на предизвици и неизвесност, мојата желба е да ѝ подарам на публиката вечер исполнета со љубов, топлина и убава музика за сите сетила – токму по Велигден, кога сите сме во духот на обновата и светлината“, вели Блаж Маротов.
Овој концерт не е само уште една музичка вечер – тоа е прослава на креативноста, автентичноста и емоционалната врска што Маротов ја гради со својата публика повеќе од една деценија.
Поканети се сите љубители на македонската песна, на добрата музика и на живиот звук. Настанот во Скопје е само вовед во малата концертна мини-турнеја, која продолжува на 24 април во Домот на културата „Антон Панов“ во Струмица.
Билетите се достапни на mktickets и во Розе Веро. Не пропуштајте вечер која ќе ги стопли срцата.
