Познатата и популарна македонска фолк пејачка Вукица Челебиева деновиве го заокружи снимањето на видеоспотот за нејзината најнова песна „Златен клуч од срцето“, дело кое носи силна лична и емотивна тежина.
Музиката и текстот на песната се на Орце Зафировски, додека аранжманот е потпишан од Љупчо Павловски. Како што истакнува самата Вукица, инспирацијата доаѓа директно од нејзиното животно искуство, а мотивацијата – од љубовта. Песната е целосно автобиографска и посветена, приказна која и денес живее и трае.
Снимањето на видеоспотот се одвиваше во прекрасниот амбиент на Ресторан Шалом – Струмица, а за визуелната реализација се погрижи докажаниот професионалец Дејан Георгиев, заедно со најдобрите Арт Студио продукција и Балкан Мјузик телевизија. Пејачката не го крие задоволството од соработката, потенцирајќи дека резултатот ќе биде видлив за јавноста за само неколку дена.
Во видеото, покрај Вукица како изведувач, се појавува и нејзината ќерка, членовите на нејзиниот Екстра бенд, девојки од играорна група од Струмица, трубачи и неколку статисти, што му даваат посебна динамика и топлина на целиот проект.
„Додека ја изведувам песната, ме потсетува на една животна приказна што сè уште трае“, искрено вели Челебиева. Нејзините очекувања се песната и видеото најпрво да бидат прифатени од публиката, а потоа да следуваат фестивалски настапи, повеќе работа и дополнителна мотивација за нови проекти.
Инаку, Вукица и понатаму активно настапува со „Екстра бенд“ низ цела Македонија, но и надвор од земјата, со јасна порака дека планови секогаш има – особено кога музиката доаѓа директно од срцето.
Текстот го подготви: Иван Јосимовски
