Неделната вечер повторно нè собра пред малите екрани – со срце полно гордост и уши отворени за звуците што нè потсетуваат кои сме. „На Здравје“ и оваа недела не не изневери – музичкиот серијал уште еднаш ја разбуди македонската душа и нè поведе на патување низ звуци, спомени и чувства.
Епизодата започна со енергично македонско оро – ритам што не само што разигрува нозе, туку ја раздвижува и емоцијата во секој што ја носи Македонија во себе. Како што вели старата поговорка, каде што зборовите завршуваат – почнува музиката. А таа, во оваа епизода, зборуваше јасно и длабоко.
Првата што го отвори вокалниот дел од вечерта беше непогрешливата Виолета Пандовска, која ја пренесе тежината и убавината на народната песна „Сестра кани брата на вечера“. Со својот богат вокал, таа како да ги пренесе гледачите во некое старо македонско село, покрај крушата и авлијата. Следуваа познатите звуци од групата Круна, кои се веќе синоним за квалитетна музичка поддршка, а вечерта ја одбележаа и настапите на голем број познати и омилени имиња.
Бобан Мојсовски со „Моја река“ внесе интимност и лирика во атмосферата, а Ивана Наумова допре длабоко со својата емотивна интерпретација на „Мораш душо да ме разбереш“. Нивните изведби беа како деликатно испишани писма до срцето на секој гледач.
Една од најпееаните и најсаканите песни на македонските прослави – „После мене“ – доби нов живот преку изведбата во живо и гласот на Стојне Николова, чие присуство е секогаш гаранција за огнена изведба. Фантази Бенд со „Лична Јовано“ додадоа нова доза ведрина, додека Саит Идоли со носталгија зборуваше за својот роден крај преку песна.
Во вториот дел од емисијата, веќе добро загреаната атмосфера кулминираше со групата Круна и Орде Неделковски и нивната разиграна „Машала машала“, а Ивана Серафимовска беше вистинско освежување со нејзината изведба на „Добро утро Македонијо“ – песна што направи дури и нашите камермани да запеат.
Младата сила на сцената ја претстави Ален Хасоновиќ, кој со својата интерпретација на „Прости ми душо моја“ уште еднаш покажа дека традицијата има своја иднина. А вистински бисери во продолжение беа и изведбите на Петар Наумов („Ако згрешам нека изгорам“), Игор Андреевски („Анѓа од Галичник“) и Пантелија Тодороска со исконската „Абре чичо“.
За крај, музичката емисија заврши како што и прилега – со химната на нашето постоење. „Земјо Македонска“ која што одекна низ студиото како одраз на сè што оваа земја значи – љубов, борба, гордост и вечна песна. Изведбата на групата Круна беше како печат на уште едно прекрасно издание исполнето со искрени гласови и чиста музика.
Следната музичка средба е закажана за недела, 29-ти јуни на добро познатата фрекфенција на најдобрата музичка телевизија во Македонија – Балкан Мјузик. До тогаш, чувајте ја македонската песна – и пејте со срце. На здравје!
Текстот го подготви: ПР тимот на Балкан Мјузик ТВ
