Вчера вечер ќе остане запаметена како една од највеселите, најразиграните и најемотивните на музичкиот серијал „На Здравје“. Во продукција и реализација на Арт Студио и Балкан Мјузик телевизија, се создаде вистинска велигденска магија која долго ќе се прераскажува.
Овој пат, сцената беше обоена во духот на големиот христијански празник Велигден, а студиото пулсираше во ритамот на македонската песна, радоста и дружењето. Насмевки, прегратки, спонтани игри и искрени емоции – сето тоа беше дел од атмосферата која траеше со часови. На едно место се собраа дел од најпознатите имиња од македонската естрада: Јордан Митев, Ванчо Тарабунов, Лени Партикова, Борче Наумовски – Министерот, Александар Ицов, Стојне Николова, Ленче Кукиќ, Елена Јовческа, Елена Андоновска… – сите заедно во една заедничка мисија: да ја донесат празничната радост до секој дом.
Посебна магија на вечерта ѝ дадоа музичките домаќини Група Круна и Орде Неделковски, кои со својата жива изведба повторно покажаа зошто се срцето на ова шоу. Секој тон беше отсвирен со душа, а секоја песна испеана со емоција која се чувствуваше во секој агол од студиото.
Студиото буквално „ечеше“ од убава македонска песна – онаа која буди спомени, спојува генерации и носи топлина во срцето. Атмосферата беше толку заразна што никој не остана рамнодушен – се пееше, се играше и се славеше како што доликува за Велигден.
Нашата екипа успеа да улови дел од тие магични моменти и преку неколку видеа да ви ја пренесе барем малку од енергијата која владееше зад камерите. Но едно е сигурно – вистинската атмосфера ќе ја почувствувате кога епизодата ќе се емитува.
Подгответе се за музичко доживување исполнето со емоции, традиција и вистинска македонска душа – затоа што ова „На Здравје“ ќе биде епизода што не се пропушта!
Текстот го подготви: Иван Јосимовски
Фото и Видео: Балкан Мјузик тв
