Во првите денови на септември, кога лозјата зрееат, а воздухот мириса на традиција и младо вино, Кавадарци станува нешто повеќе од град – станува сцена, срце и душа на Македонија. Од 5-ти до 7-ми септември, „Тиквешки Гроздобер 2025“ ќе блесне со полн сјај, претворајќи ја Тиквешијата во жариште на музика, култура и веселба.
Под мотото „Традиција, забава и добро вино“, годинашното издание не е само манифестација – тоа е празник на идентитетот, каде се слави она што сме и каде сакаме да бидеме. А во првите редови на оваа прослава – стојат македонските музички имиња, подготвени да го разбудат духот на секој посетител.
Музичката програма ќе започне на 5-ти септември со урбани вибрации, каде македонската публика ќе има можност да ужива во настапот на Тајзи, еден од најавтентичните македонски гласови кој со својот реге-поп звук веќе години наназад ги освојува сцените низ Балканот. На сцената ќе му се придружи и Ди-Џеј Оки Доки, чиј ритам ќе го загрее плоштадот уште од првата вечер, во микс што ќе ги стопи границите меѓу традицијата и современото.
Саботата ќе биде празник за сите сетила. Улиците ќе грмат од моторите на мото-релито, ќе се смеат со маските од Тиквешкиот карневал, а вечерта – ќе запее душата. Андријана Петрушовска, новата надеж на македонската сцена, ќе внесе свежина и емоција. Публиката ќе ја поздрави и харизматичната Џејла Рамовиќ, а кулминацијата ќе ја донесе Наташа Беквалац, со шоу какво што само таа знае да приреди.
Неделата ќе биде денот кога традицијата ќе ја сретне емоцијата. Детскиот карневал и изложбата на олдтајмери ќе го обојат денот, но вечерта ќе биде резервирана за гордоста на македонската поп сцена – Либеро Бенд. Нивниот настап ветува вистинска фешта исполнета со хитови кои секој ги пее. Финалето ќе биде резервирано за балканската дива Марија Шерифовиќ, чиј вокал никогаш не остава никого рамнодушен.
Со внимателно селектирана програма која ги задоволува сите генерации, „Тиквешки Гроздобер 2025“ не само што ќе го прослави виното и жетвата, туку пред се и македонската, но и балканска музика, која и оваа година ќе биде столб на забавата. Очекувајте уште едно незаборавно издание во срцето на Тиквешијата – каде секој глас, нота и насмевка раскажуваат приказна за нашата култура, традиција и иднина.
Тиквешки Гроздобер не е само фестивал – тоа е срцето на Македонија што чука три дена во ритамот на музиката, смеата и виното.
Текстот го подготви: ПР тимот на Балкан Мјузик ТВ
