Македонската фолк сцена добива проект кој носи силна емоција, јасна порака и длабока поврзаност со корените. Фолк пејачката Лени Партикова повторно е во центарот на вниманието, интензивно работејќи на својот нов музички проект насловен „Горда сум Македонка“ – наслов што зборува сам за себе и ја отсликува нејзината љубов кон македонската песна, традицијата и националниот идентитет.
Како најава за претстојниот албум, Партикова го подготвува и објавувањето на песната „Калеш старосватица“, композиција која ветува силна фолк емоција, автентичен вокален израз и звук длабоко вкоренет во македонското музичко наследство. Песната ќе биде модерен аранжман со традиционален дух – мост помеѓу старото и новото време.
Албумот „Горда сум Македонка“ ќе содржи вкупно 15 песни, создадени со многу љубов, искреност и почит кон фолк музиката. Секоја композиција носи своја приказна – блиска до народот, до емоцијата и до животот, со цел да се зачува македонската музичка традиција, но и да се доближи до помладата публика. Круна на овој значаен проект ќе биде и големиот концерт со ист наслов, кој ќе се одржи на 17 јануари 2026 година, со почеток во 19 часот, во Културниот дом „Иљо Антески – Смок“ во Тетово. Публиката ќе има можност во живо да ужива во новите песни од албумот, како и во добро познатите хитови од досегашната кариера на Лени Партикова.
И овој концерт, како и претходниот, ќе биде реализиран и професионално снимен од единствената музичка телевизија во Македонија – Балкан Мјузик телевизија, што дополнително ја потврдува важноста и тежината на целиот проект.
Со „Горда сум Македонка“, Лени Партикова испраќа јасна порака –македонската фолк песна живее, се развива и заслужува да биде негувана со срце и достоинство.
Текстот го подготви: Иван Јосимовски
