Пред само неколку дена, популарниот македонски состав Модерато Бенд, кој доаѓа од музичкиот град Кавадарци, сними видеоспот за својата прва авторска песна со наслов „Слуга“ – емотивна љубовна балада која најавува ново и посериозно поглавје во нивната кариера.
Комплетен автор на песната е нивниот долгогодишен соработник и пријател Тодор Ушитков – кој ги потпишува текстот, музиката и аранжманот. Аудио-материјалот е снимен на специфична и инспиративна локација – студиото „Во подрумот“ кај Ангел Ќосев, каде се доловила интимната емоција на песната.
„Тодор ја напиша песната буквално за нас – го познава нашиот звук, нашата енергија и чувството што го носиме кога свириме. „Слуга“ ја почувствувавме уште од првото слушање“, велат од бендот.
Креативниот и визуелно впечатлив видеоспот е реализиран во соработка со врвната продукција Арт Студио и Балкан Мјузик ТВ, кои и овој пат стојат зад професионалната и уметничка видео-реализација. Снимањето се одвивало на повеќе урбани и елегантни локации низ Кавадарци – меѓу кои Хотел „Вила Бела“, Brick Bar, како и други автентични простори.
„Целото снимање помина во најдобар ред, со фантастична атмосфера и тимска хемија. Благодарни сме за професионалниот однос и позитивната енергија на сите што беа вклучени“, додаваат од Модерато Бенд.
Во видеото учествуваат млади актери и статисти од Кавадарци, кои даваат дополнителна живост и локален печат на приказната.
Иако се во продукциски период, членовите на Модерато Бенд активно настапуваат на свадби, приватни прослави и клубски свирки низ цела Македонија. Најголемото ново нешто е нивниот настап на големата сцена на „Пивофест“ во Прилеп на 20-ти јули, каде ќе настапат со свој репертоар пред илјадна публика.
„Ова лето ни е навистина исполнето – многу настани, нови контакти и инспирација. А нашата прва авторска песна е само почеток. Фановите можат да очекуваат уште авторски песни и многу проекти што ги подготвуваме со љубов и посветеност“, велат од бендот.
Официјалната промоција на песната и видеоспотот ќе биде објавена наскоро преку каналите на Арт Студио продукција, Балкан Мјузик ТВ, YouTube, како и на социјалните мрежи на Модерато Бенд. Останете со нив – бидејќи ова е само почеток на нешто многу големо и убаво.
Текстот го подготви: ПР тимот на Балкан Мјузик ТВ
