Битолската група „Милениум“ повторно ја потврдува својата љубов кон македонската народна музика со најновиот проект снимен во живо, во соработка со Арт Студио продукција и BalkanMusic TV.
Групата „Милениум“ од Битола, која во овој состав активно твори и настапува од 2008 година, зад себе има два студиски албума со авторски песни и бројни настапи низ цела Македонија. Публиката ги препознава по автентичниот звук и енергијата на сцената, а нивната посветеност кон македонската музичка традиција сега се потврдува и со најновиот проект – збирка на кавер-композиции од најпознатите народни песни.
Овој уникатен музички проект е снимен во живо во хотел „Епинал“ во Битола, во соработка со Art Studio продукција и BalkanMusic TV, медиум кој групата го смета за најгледан и највлијателен во промоцијата на квалитетна македонска музика.
„Ова е одлична реклама за секој бенд во земјава. BalkanMusic TV моментално е најсилна платформа што пренесува убава и квалитетна музика“, велат членовите на групата.
Групата брои шестмина искусни музичари:
- Стево Мегленски – вокал
- Стефче Колески – кларинет, саксофон и народни инструменти
- Владимир Андревски – клавијатури
- Борче Тасевски – хармоника
- Златко Апостоловски – бас гитара
- Стојанче Пиловски – ударни инструменти
Најновиот проект се состои од најбараните народни песни, токму оние кои публиката ги посакува на нивните настапи. Секој тон е отсвирен во живо, со голема љубов и почит кон македонската музичка традиција. За целосно доживување и атмосфера, во проектот учествуваше и ансамблот за фолклор „Гоце Делчев“, чии членови се погрижија за визуелниот и традиционален печат.
По две успешни учества во минатото, групата ќе настапи и на годинешниот „Фолк Фест Валандово“, што уште еднаш ја потврдува нивната активна улога во современиот фолк пејзаж на Македонија.
