Македонската музичка сцена добива нова свежина со проектот „Мини шоу“, првиот официјален проект на велешкиот Арена Бенд. Со оваа иновативна музичка концепција, бендот има за цел да донесе енергија, динамика и возбуда, оставајќи силен впечаток кај публиката и поставувајќи нови стандарди.
„Мини шоу“ кои што го најавуваат момците од Арена бенд, всушност претставува внимателно структуриран музички проект кој содржи неколку сетови, секој од нив со посебен дух и енергија. Бендот нè почести со четири музички аранжмани:
- Македонски сплет – омаж на македонската музичка традиција, со преработки на некои од најпознатите народни песни;
- Свадбарски сплет – сет кој ќе внесе веселба и динамика на секоја прослава;
- Балкан Парти Микс – микс од хитови од Балканот, гарантирајќи незаборавна атмосфера и
- Чочек – ритмична, енергична изведба која секој ќе го покрене на танц.
Бендот е составен од пет исклучително талентирани момци – професионални музичари, кои со својата вештина и харизма го обликуваат уникатниот звук на Арена Бенд: Мартин Милошевски – вокал (фронтмен на бендот), Тале Наковски – кларинет и саксофон, Баже Јанковски – хармоника, Марио Иванов – бас гитара и Ерсин Абудлов – ударни инструменти.
Покрај основната постава, за реализацијата на музичкиот проект, бендот соработуваше со врвни музичари кои дадоа дополнителен квалитет и уникатен звук на проектот. Живко Огњанов со неговата тарабуката и Елдин Усеиновски со својот впечатлив гитарски израз го збогатија аранжманот, создавајќи извонредно музичко совршенство.
За беспрекорниот аудио микс, Арена Бенд му ја довери работата на Димовски Медиа, кои се погрижија секој тон да биде совршено обликуван. Визуелната реализација беше исто така на високо и професионално ниво, благодарение на соработката со Арт Студио продукција и Балкан Мјузик телевизија, кои преку професионална продукција и креативна визуелизација го пренесоа вистинскиот дух на проектот.
Со проектот „Мини шоу“, Арена Бенд не само што го најави своето присуство на македонската музичка сцена, туку и потврди дека имаат многу што да понудат. Како што велат самите членови на бендот, ова е само почеток – а наскоро публиката ќе има можност да ужива и во нивната авторска музика.
Ако нивното „Мини шоу“ биде показател за нивниот талент, тогаш нема сомнеж дека Арена Бенд е на добар пат да стане значајно име во македонската музичка индустрија. Со нивната енергија, креативност и квалитет, сигурно ќе ги освојат срцата на љубителите на добрата и квалитетна музика.
Наскоро на Балкан Мјузик телевизија.
