Со силна емоција, духовна порака и автентична македонска традиција, на музичката сцена пристигнува новата песна „Денес е Велигден“ – проект на познатата и популарна фолк пејачка Лени Партикова создаден како искрен подарок за публиката по повод најголемиот христијански празник.
Станува збор за дело во кое се испреплетуваат верата, љубовта и заедништвото – вредности кои Велигден ги носи со себе. Авторот на текстот преку стиховите успева да ја долови топлината на празничната атмосфера, убавината на македонските цркви и духот на народот. Видеоспотот, кој е клучен дел од оваа приказна, е снимен во црквата „Рождество на Пресвета Богородица“, што му дава посебна духовна тежина на целиот проект. Приказната започнува со кадри од камбанаријата и звукот на камбаните – момент што веднаш ја воведува публиката во велигденската атмосфера.
Наративот продолжува со симболични сцени – влегување во црквата, прекрстување и оставање велигденско јајце, како вечен симбол на животот и воскресението. Во текот на видеото се испреплетуваат кадри од црковниот хор, иконите, верниците, како и емотивни сцени со деца кои носат велигденски јајца и украси.
Посебна динамика внесуваат сцените што постепено ја градат приказната – од тивка духовна атмосфера во црквата, до разиграна и радосна прослава во црковниот двор. Со ора, детска смеа и народно заедништво, видеото кулминира во моќен финален момент кога сите заедно извикуваат: „Христос Воскресе – Навистина Воскресе“.
Токму овој момент, според авторот, бил и најемоционалниот дел од снимањето – искрен, чист и исполнет со вистинска празнична радост.
Во реализацијата на проектот учествувале бројни соработници, меѓу кои црковниот хор под водство на маестро Андреј Наунов, како и КУД „Шара“. Посебен белег на видеото даваат и децата – Христина, Јована, Анѓа, Ива, Петра, Борјан, Стефан, Горан и Џан Дестановски – кои внесуваат искрена енергија и топлина.
Зад музиката и аранжманот стои Љупчо Павловски, режијата е на Жарко Ѓорѓески, додека најдобрите – Арт Студио продукција под раководство на Дејан Горгиев го снимаа и пост-продукциски го реализираа видеоспотот за оваа песна. За Лени на видеоспотот да биде совршена се погрижи Ива Ѓошиќ, млада но сепак професионална и одлична шминкерка.
Песната „Денес е Велигден“ ќе ја има својата премиера на првиот ден од Велигден (13.04.2026 – понеделник), кога публиката ќе може да ужива и во видеото. Очекувањата се дека ова дело ќе стане дел од празничната традиција и ќе допре до сите генерации.
Покрај овој проект, најавени се и нови музички изданија – сплетови на забавни и народни песни во соработка со Група Амбасадор, како и нови видеоспотови за песните „Калеш Старосватица“ и „Златни бурми Венчални“ со истата професионална добро позната екипа. Во подготовка е и нов албум, како и настапи на домашни фестивали.
Со оваа песна, публиката добива повеќе од музика – добива чувство, порака и вистинска велигденска магија.
Христос Воскресе!
Текстот го подготви: Иван Јосимовски
Фото: Арт Студио продукција
