Вистинските музички ѕвезди се скромни, пленат со своите песни и енергија која ја даруваат кога се на сцената, не говорат многу за себе туку оставаат другите да говорат за нив, преку своите песни допираат до душата на слушателот и имаат цела армија свои обожаватели кои наизуст ги знаат и пеат истите…и недостасуваат, многу недостасуваат кога ќе го напуштат овој свет…
Една таква ѕвезда беше и хрватскиот пејач Оливер Драгојевиќ кој пред три години почина по тешко боледување. По тој повод на плоштадот во неговата омилена Вела Лука, во вечерните часови ќе се одржи голем концерт насловен како “Трага во бесконечност”. Во негова чест и со голема празнина во срцето, неговите безвременски хитови ќе ги исполнат некои од музичките пријатели кои сеуште тагуваат по него…Џибони, Теди Спалато, Марко Тоља, Антонио Серано, Дупини и клапата “Ошјак”. До длабоко во ноќта, ветрот ќе ги носи и разлева звуците на незаборавните “Галеб и ја”, “Скалинада”, “Малинконија”, “Опрости ми папе”, “Молитва за Магдалену”, “Вјеруј у љубав”, “Свирајте ноћас за моју душу”, “Што то бјеше љубав”, “Цесарица” и многу други… песни без кои не може да се замисли една љубов, еден спомен и една иднина…
