Утрово, по кратко боледување, на 75-годишна возраст почина еден од највлијателните и најпрепознатливи гласови на македонското радио — радио-водителот и диџеј Драган Б. Костиќ. Веста ја потврдија членовите на неговото семејство.
Костиќ својата богата медиумска кариера ја започна во 1970-тите години во Македонското радио, време кога радиото беше главниот прозорец кон светот на новата музика. Со својот специфичен стил, енциклопедиско музичко знаење и автентична радиофоничност, тој брзо прерасна во култна фигура на македонскиот етер.
Најголема препознатливост стекна преку емисиите „Радио урнебес“, „Диско селектор“ и „Заборави ако можеш“, а неговиот авторски печат силно се чувствуваше и во проектите „Кавервил“, „Чартфајл“, „Б.“ и многу други. Преку нив, Костиќ не само што ја едуцираше публиката, туку и создаваше генерации слушатели со префинет музички вкус.
Во 2018 година, својот долгогодишен радиофонски израз го пренесе и на телевизиски екран со емисијата „Б со точка“ на Телевизија 24, која се емитуваше во две сезони, до 2019 година, задржувајќи ја истата аналитичка длабочина и страст кон музиката.
Својата 50-годишна кариера, во 2024 година, Костиќ ја одбележа со големиот музички настан „Последниот танц“, одржан во спортскиот центар „Јане Сандански“ во Скопје — вечер исполнета со емоции, спомени и музика која го одбележа неговиот живот.
Со заминувањето на Драган Б. Костиќ, македонската медиумска сцена загуби глас кој не се повторува. Неговото наследство ќе продолжи да живее преку снимките, сеќавањата и музиката што несебично ја споделуваше со публиката повеќе од половина век.
Текстот го подготви: Иван Јосимовски
